Per il di dad oz èn en l’entira Svizra chaumas da las dunnas. Deplorablamain na saja strusch sa midà insatge dapi la gronda chauma il 2019 pertutgant paja e respect, quai han communitgà las organisaturas en vista a las manifestaziuns planisadas. Ellas sa dostan cunzunt cunter la refurma da l’AVS e cunter l’inegualitad tranter um e dunna.
I saja schizunt vegnì mender, perquai che cun la refurma da rentas AVS 21 haja il parlament decidì in project da reducziun sin donn e cust da las dunnas. E quai malgrà che las dunnas survegnian anc adina radund in terz damain renta ch’ils umens.
Cunter violenza sexuala e guerra
Er violenza sexuala saja in grond problem en la societad. Mintg'onn vegnian registrads 20'000 cas da violenza a chasa. Quants umans ch'han endirà violenza pervia da lur identitad da schlattaina u pervia da lur orientaziun sexuala na stettia anc gnanc en la statistica, ha communitgà il collectiv feministic da la chauma da Berna. Mintga segunda emna dettia in femizid.
Medemamain in tema è per exempel a Cuira la guerra en l’Ucraina. Da guerras patriarcalas pateschian tuts – dunnas, umens ed uffants.
Er en il Cussegl grond èsi in zic violet
Betg mo sin las vias en Svizra è la colur violet da vesair oz – mabain er en il Cussegl grond a Cuira è quai fitg prominent davant dal tut.
Ina da la chauma na saja ella dentant betg. Las bleras deputadas dumandadas èn dentant fermamain da l'avis ch'i dovra la chauma per dar in signal. Ina u l'autra è dentant er da l'avis che la chauma n'è betg la dretga via e ch'i dettia autras pussaivladads per far attent sin ils problems en connex cun l'inegualitad.