Il nov rapport da l'Uffizi federal da l'ambient mussà che la Svizra sto probabel s'endisar vi da la chalira la stad. Il 2022 ha purtà records da chalira tut a dubel.
L'onn 2022 è stà Il pli chaud e l'onn cun il pli bler sulegl, davent ch'ins ha cumenzà a mesirar 1864. Plinavant èsi stà l'onn cun
- la segund chauda stad (davent dal cumenzament da las mesiraziuns)
- il pli chaud di a Genevra (38,3 grads)
- la pli lunga perioda da chalira a Lugano: 14 dis cun temperaturas sur 30 grad
- ils pli blers dis da chalira (63) a Stabio (TI): record per la Svizra
- las pli bleras uras da sulegl a Genevra e Basilea
- il cunfin da null grads sin in'altezza da record sin 5'184 meters sur mar
La stad dal 2022 è stada la segund chauda suenter la stad da chalira il 2003: Là esi vegnì tschantschà da flums e prads setgentads e 1'400 morts e mortas en la Svizra en connex cun la chalira.
La unda da chalira da l'emna passada en Svizra ha gia tutgà tar ina cun dis fitg chauds en Svizra. Il mardi passà èsi stà a Cuira 37,6 grads, a Genevra 37,4 grads ed a Biasca 35,3 grads. Ad Evolène en il Vallais è il mardi schizunt gia stà il pli chaud di dapi il cumenzament da mesiraziuns.
