Tge spetga la Svizra?
Davent da sonda suentermezdi e spezialmain durant la notg spetga il meteorolog Luzian Schmassman en il Giura, en la Svizra dal Nordvest, en la Svizra centrala ed en las prealps ferms urizis. Il pli grond privel èn suffels da stemprà, ed er suffels d'orcan na pon betg vegnir excludids. Plinavant pudessi dar granella e bler plievgia.
Èn ils urizis cumparegliabels cun il mardi passa?
La situaziun d'aura è en general sumeglianta, i dat dentant detagls ch'èn differents. Il mardi na devi per exempel betg granella. Ins sto tuttina spetgar sumegliantas chaussas sco il mardi: plontas che crodan enturn, restricziuns en il traffic d'aria e da viafier. I n'è en il mument anc betg cler sch'ils urizis vegnan a pertutgar l'entira Svizra, u mo singulas regiuns. En il mument quinta il meteorolog Schmassman che las alps ed il sid n'èn betg pertutgadas.
Datti inundaziuns?
En general poi dar tar mintga urizi inundaziuns. Ils urizis da la fin d'emna van dentant sperasvi relativamain svelt, uschia ch'ins na sto betg avair tema da flums ed auals che van sur las rivas. Sch'i dat dentant plirs urizis al medem lieu, èn inundaziuns singulas pussaivlas.
Ha SRF Meteo dà or in avertiment d'urizis?
Gea, l'emprim stgalim, stgalim mellen. Quai munta ch'i po dar urizis en las regiuns cun il stgalim. Il davos mardi hai er dà quai avertiment, plinavant cun in avertiment da privel da vent da stgalim oransch. En il mument na datti qua anc nagin avertiment da privel da vent, quai pudess dentant anc sa midar.
Pon ins spetgar cun urizis l'emna che vegn?
En general èsi sulegliv. La Svizra vegn dentant adina puspè tutgada da disturbis flaivels che pon incitar ils tipics urizis da stad en las muntognas ed urizis damaun en la Bassa. La Svizra è en ina situaziun d'aura instabila, en la quala ch'i pudess dar urizis mintga di insanua.
