Passa 56 milliuns francs haja la fundaziun investì en 326 projects da sias organisaziuns partenarias en 42 pajais sin l'entir mund. Grondas crisas umanitaras, ina rimnada istorica ed in'unda da solidaritad hajan influenzà l'onn 2022.
Fin la fin da l'onn haja la Chadaina da Fortuna rimnà passa 130 milliuns francs per gidar l'Ucraina ed ils pajais vischins. Cun questas donaziuns ha la Chadaina da Fortuna finanzià projects d'agid da sias organisaziuns partenarias, gist suenter l'entschatta da la guerra ils 24 da favrer.
Agid er per il Pakistan e l'Africa da l'Ost
Suenter ch'inundaziuns han cuvert grondas surfatschas dal Pakistan la fin d'avust, ha la Chadaina da Fortuna survegnì passa 5,3 milliuns francs. Cun ils daners rimnads hajan las organisaziuns partenarias pudì furnir agid d'urgenza a moda svelta.
Ils 23 da november ha la fundaziun organisà ensemen cun la SRG SSR in di da solidaritad per las regiuns da l'Africa da l'Ost pertutgadas da sitgira. Fin la fin da l'onn hai dà 13,8 milliuns francs per l'agid en Somalia, Kenia e l'Etiopia.
Passa 11,5 milliuns francs han ins duvrà en Svizra per gidar persunas senza tetg, per fugitivs da l'Ucraina sco er per sustegnair uffants e giuvenils en paupradad.
Ulteriurs temas da la lavur da la Chadaina da Fortuna èn da finanziar projects per uffants sco er l'agid en Afganistan suenter ch'ils talibans han puspè surpiglià il pajais e projects per persunas fugidas en Europa.
