- Il Tribunal decida ch'i dat in process d'appellaziun cunter Pierin Vincenz.
- Il 2024 aveva la Dretgira superiura da Turitg abolì la sentenzia da la preinstanza e pretendì da la procura publica da meglierar l'acta d'accusaziun.
- La Dretgira superiura da Turitg sto uss exequir la procedura d'appellaziun.
Il Tribunal federal ha puspè mess en vigur la sentenzia dal la dretgira districtuala da Turitg cunter l'anteriur schef da la banca Raiffeisen Pierin Vincenz ed auters inculpads. La Dretgira superiura da Turitg aveva ordavant abolì questa sentenzia cun l'argumentaziun che l'acta d'accusaziun saja stada memia detagliada. Da quest avis n'è il Tribunal federal betg. Uss sto la Dretgira superiura da Turitg exequir la procedura d'appellaziun.
Plirs onns praschun
A Vincenz e Beat Stocker ha la procura publica renfatschà d'avair sa participà ad interpresas, e silsuenter guardà che la Raiffeisen ed Aduno cumprian questas interpresas. E Stocker e Vincenz n'hajan betg fatg transparent lur participaziun vi da questas interpresas. La sentenzia da l'avrigl 2022 muntava a trais onns e nov mais praschun per Pierin Vincenz. Gia il schaner 2023 aveva sia defensiun annunzià da far recurs suenter ch'els avevan survegnì l'argumentaziun da la sentenzia.
