Parlamentarias e parlamentaris Grischuns dian gea. Da principi vulan 6 da 7 candidar anc ina giada. Mo tar Sandra Locher-Benguerel datti anc in segn da dumonda. Ella ha ditg ch’ella sa concentreschia uss sin questa legislatura e decida cura ch’il temp è qua sco ch'i va vinavant. En la contribuziun (survart) vegnan las politicras ed ils politicers a pled. Cun quai che la Cussegliera naziunala Magdalena Martullo è per il mument en l'exteriur n'èsi betg stà pussibel da telefonar cun ella. Ma Martullo ha prendì posiziun a scrit. Stan oz vegn ella er puspè a candidar il 2023.
Partidas en modus d'elecziun
Era sche las elecziuns per il parlament federal han pir lieu en dus onns, datti gia uss singuls signals ch'i va vers il cumbat electoral. In dals signals è che las partidas preparan iniziativas. Cun quellas pon ins numnadamain cuntanscher la populaziun ed iniziativas èn in instrument per las partidas da sa posiziunar.
Uschia prenda la Partida socialdemocratica per exempel si in tema social. La partida ha gia ramassà suttascripziuns per in’iniziativa che vul procurar per premias da las cassas da malsauns pajablas. L’intent è che nagin duai pajar dapli che 10% da las entradas per las cassas da malsauns. L’Allianza dal center ha perfin annunzià duas iniziativas. Era quellas en lur tematica da coc: Politica da famiglias. Per l’ina vul la partida abolir l’inegualitad tar la taglia per pèrs maridads e per l'autra vul ella cun ina segunda iniziativa che pers maridads survegnan tant AVS sco sch'i na fissan betg maridads. Ord circuls da la partida populara svizra aud'ins che la partida pudess tut tenor vegnir cun in’iniziativa che vul reducir las contribuziuns da las taxas per radio e televisiun. E las dunnas da la Partida liberaldemocratica han avant curt lantschà in'iniziativa per l’imposiziun da taglia individuala, vul dir: dunnas ed umens duain pajar taglia independent dal stadi civil.
Plazzar temas
Singulas partidas han gia plazzà temas cun quels ch'ellas van a chatscha da votantas e votants.
- Il pli cler forsa la PPS. La partida metta vinavant sin lur image d’opposiziun. Questa giada cun focus sin in foss tranter champagna e citad. Quellas differenzas emprova la partida da giugar ora. E quella rolla d’opposiziun piglia la PPS era si en connex cun la pandemia. Uschia sa posiziuneschan la partida sco unica cunter la lescha da covid.
- L’Allianza dal center emprova per il mument en emprima lingia da sa posiziunar cun in nov image. Cun midar num e vegnir davent dal «cristiandemocratic» ha la partida la speranza da cuntanscher dapli votantas giuvnas.
- Ord l'optica dad oz guardi ora uschia che las partidas sanestras – oravant tut quellas ch'han in verd en il num – pon puspè profitar. Quai perquai che la crisa dal clima vegn valitada da la populaziun svizra sco la pli gronda sfida politica.
- Interessant vegn ad esser d’observar la Partida liberaldemocratica. Stan oz tutga la PLD tar quellas partidas che perdan. La partida ha in grev onn davos ella. En las dumondas principalas n’era la PLD betg perina – per exempel quant ecologica che la partida duai esser. Ed i ha dà ina midada a la testa: Per Petra Gössi è vegni Thierry Burkart. Perquai èsi per il mument grev da dir cun tge strategia che la partida va en il cumbat electoral e co che la testa vul unir la partida.
