Ils 13 da december, cura che l'entir Cussegl federal vegn reelegì, vul ella tschentar ina candidatura per il sez da la PLD. La partida ha infurmà davart la decisiun da la fracziun la sonda en ina communicaziun a las medias.
La Partida verda ha gì sco finamira per pretender in sez ch'ella cuntanscha 10% vuschs a las elecziuns federalas. Cun 9,8% è il resultat stà levet sut quella finamira. En la communicaziun scriva la Verda, i dovria ina nova furmla magica, e ch'i dovra «il clima» en il Cussegl federal. Ella argumentescha, ch'ella saja represchentada en 16 chantuns, e ch'i saja la segund-gronda fracziun en l'istorgia da la partida en il parlament svizzer. I dovria ina vusch per il clima e l'egualitad tranter las schlattainas. Dapi il 2019 sajan dapli ch'in quart da las votantas ed ils votants excludids da la regenza.
Tenor Georg Halter da SRF haja la partida er considerà da contestar in sez da la PS avant las elecziuns. Quella haja dentant fatg in memia bun resultat, ed è cleramain segund-ferma partida. Tenor Halter saja la candidatura per in sez en il Cussegl federal ina necessitad, perquai che la partida na possia betg crititgar la regenza senza vulair sa participar sezza a quella.
La candidatura n'haja dentant nagina schanza. Ina davosa giada è Christoph Blocher il 2007 betg vegnì reelegì. Er sche la partida ha dapli dretgs sin in sez che la PLD sin in segund, dettia pir ina schanza cura ch'insatge da la PLD demissiunescha en il Cussegl federal. Er quai na vegnia dentant betg simpel per la partida. Fin proxim venderdi pon commembras e commembers da la Partida verda annunziar ina candidatura.
