Nus faschain quai bunamain mintga di: Nus cliccain sin «acceptar tut» tar ils banners da cookies sin paginas d'internet ed apps. Declerà a moda simplifitgada, dain nus uschia il consentiment che tschients firmas pon far diever da nossas datas per far reclama. Questas firmas pon analisar nua che nus sa trategnain online e pon far profils sur da nus, per uschia mussar reclamas a moda individuala.
Ditg valeva la reclama persunalisada sur l’uschenumnà «Programmatic Advertising» sco ina sort da Sontg Graal da la branscha da reclama. Ma ils ultims onns è s’accumulada la critica. Uschia han retschertgas da SRF mussà che la rimnada da datas tras firmas da reclama ha cuntanschì dimensiuns extremas. Ma en la branscha datti ussa – almain per part – ina midada dal pensar.
Datas pon vegnir vendidas a persunas criminalas
In auter problem en connex cun il tracking per far reclama: ils partenaris na vegnan strusch controllads. En il fratemp n'èsi betg pussaivel da controllar, tge che capita cun las datas per part fitg sensiblas. Nagin n'ha la survista, tgi che las firmas partenarias da quests banners da cookies èn e sch'ellas sa tegnan vi da las reglas. Uschia vegn ina part da las datas vendida sin martgads dubius.
Era sche las infurmaziuns che nus dain liber vegnan propi duvradas mo per far reclama, vegn dubità en il mund professiunal da Cybersecurity. I dat firmas che han stuì pajar grondas multas en il passà, perquai ch’ellas han vendì sapientivamain datas a cugliunaders ed a cugliunadras. In exempel è il cas Epsilon: La firma da commerzi da datas ha transmess durant onns datas sensiblas a criminals.
La rubrica «Digitip» preschenta mintga glindesdi applicaziuns nizzaivlas, trics cun software e declera terms or dal mund digital.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
