«Hallo mamma, mes telefonin è rut, qua è mes nov numer. Ma tramettas ina novitad sin Whatsapp?» – Cun talas novitads emprovan cugliunaders da vegnir tar daners. Sch’ins sa lascha en sin ina conversaziun, vegn bainprest ina pretensiun da daners: «Jau stuess transferir oz dus pajaments, ma mes telefonin è rut ed jau na poss betg ir en mia app. Pudessas ti far quai?»
Dal tuttafatg nov na saja questa mascha da fraudar betg, scriva il Center naziunal per la segirezza da cyber NCSC sin dumonda da SRF «Espresso», ins observa gia in temp quest agir. Cugliunaders contacteschan persunas casualas cun la medema novitad e speran ch'ellas cuntanschian propi ina mamma che reagescha sin quai e che surdat la finala daners.
Stizzar las novitads e bloccar il numer
Il NCSC cusseglia da stizzar ils messadis, da bloccar il numer e d'annunziar ad els il cas sin lur pagina d'internet. Grazia a talas annunzias percorscha il NCSC tendenzas e privels pussaivels e po agir sistematicamain encunter.
Tgi ch'ha gia pajà daners duess infurmar uschè spert sco pussaivel sia banca u ses institut da finanzas, uschia possian ins anc franar in pajament eventual, scriva la Cybercrime Police sin sia pagina d'internet. Sch'ils daners èn gia davent, s'annunzian ins il meglier tar la polizia da ses lieu da domicil e fa ina denunzia.
