Il parlament svizzer na vul naginas midadas da curs. Dentant duai dar novas reglas per dumondas d'asil. Sch'ina persuna vegn or d'in stadi terz segir, na duai sia dumonda d'asil betg vegnir tractada. Ina moziun correspundenta ha il Cussegl naziunal approvà. Il Cussegl federal è encunter ina midada da la lescha d'asil e di ch'ina tala na faschess betg pli pussaivel da prender si persunas or da motivs umanitars. La moziun va uss en il Cussegl dals chantuns.
Nagins contingents e proceduras en l'exteriur
Proceduras d'asil na duain betg vegnir fatschas en l'exteriur, han omaduas chombras decidì. Ina moziun da Gregor Rutz (PPS) han els refusà. Medemamain na datti nagina regulaziun autonoma da l’immigraziun cun dumbers maximals per onn e contingents. La fracziun da la PPS ha vulì quai e fatg attent sin l'approvaziun da l'iniziativa d'immigraziun da massa.
