La Confederaziun na survegn definitivamain betg daners per construir ulteriurs alloschis per requirents d'asil. Il Cussegl dals chantuns ha refusà ina proposta da cumpromiss da la conferenza d'intermediaziun. Cun quai è la fatschenta giud maisa.
Il Cussegl federal aveva oriundamain dumandà il parlament da conceder 133 milliuns francs per construir vitgs da containers per requirents d’asil sin terren da l’armada. Suenter ch'il Cussegl dals chantuns ha refusà questa dumonda, ha il Cussegl naziunal scursanì la contribuziun per la mesadad sin radund 66 milliuns francs. Dentant n'ha era questa proposta gì nagina schanza en la Chombra pitschna.
