La presidenta da la cumissiun da l'UE Ursula von der Leyen e la scheffa da la regenza taliana Giorgia Meloni han visità la fin d'emna sin Lampedusa in cuntschet ch'è prevesida per las migrantas e migrants ch'arrivan sin l'insla. La migraziun irregulara saja ina sfida europeica che dovria ina resposta europeica, uschia Von der Leyen. Ella haja intimà auters stadis commembers da l'UE da distgargiar l'Italia. Sin la insla pitschna tranter la Sicilia e l'Africa dal nord eran arrivads millis migrantas e migrants ils dis passads.
Meloni ha pretendì agid
L’Uniun europeica stoppia reagir en vista a la situaziun tendida sin l’insla Lampedusa. Quai pretenda la primministra taliana Giorgia Meloni. Millis da migrants e migrantas sajan arrivads a Lampedusa ils davos dis. Il champ per l’emprima registraziun saja fullanà. En consequenza pretenda Meloni agid da l’UE per impedir che migrants emprovian da traversar la Mar Mediterrana. En il mender cas stoppia la marina intervegnir. Plinavant ha la primministra taliana envidà la presidenta da la cumissiun da l’UE, Ursula von der Leyen, da visitar l’insla e da sa far in maletg da la situaziun.
Entant ha la Germania annunzià da tuttina puspè vulair prender si migrantas e migrants da l’Italia. Damai che Roma refusescha da prender enavos migrants ch’arrivan sur l’Italia en Germania, ha Berlin chalà da prender si voluntarmain migrants nà da l’Italia. En vista a la situaziun sin l’insla Lampedusa veglia la Germania dentant ademplir sia «obligaziun solidarica» ha ditg la ministra da l’intern Nancy Faeser. Sulettamain l’onn current han bunamain 126'000 migrants cuntanschì las costas talianas.