En il mument na stoppian ins anc betg decider novas mesiras, ha ditg Berset suenter in barat cun il president da la Confederaziun ed il president dals directurs a las directuras chantunalas da sanadad Lukas Engelberger.
L'augment da las infecziuns cun omicron creschian fitg ferm, ha ditg Berset vinavant. Er il dumber d'ospitalisaziuns vegnia a crescher, anc na possian ins però betg dir quantas persunas che dovrian tgira intensiva.
Proxim pass èn serradas
Sche la situaziun sa pegiureschia possian ins dentant reagir fitg svelt, in proxim pachet cun mesiras saja gia avant maun – previs sajan tranter auter serradas. En pli ha il minister da sanadad accentuà l'impurtanza ed appellà a la populaziun da sa laschar vaccinar. Il vaccin, sco er il booster protegian dad in grev decurs da la malsogna. Impurtant saja er da reducir contacts e sa laschar testar regularmain.
Entant han divers chantuns decis da rinforzar lur mesiras, tranter auter il Vallais ed il Tessin, nua che las cifras creschan anc pli svelt ch'en ils auters chantuns.
