- Il Cussegl federal metta a disposiziun ulteriuras 32 milliardas per l'economia.
- Er persunas che lavuran sur sa sezzas duain profitar da quest pachet da finanzas.
- 280 milliuns francs vul il Cussegl federal investir per la cultura,
- 100 milliuns francs per il sport
- 20 milliardas francs vul il Cussegl federal investir per interpresas che han problems da liquiditad.
- Lavur curta vegn extendida: Da nov han era persunas cun contracts limitads il dretg sin lavur curta. Er emprendists duain vegnir sustegnids. Il process vegn simplifitgà.
- Indemnisaziuns per geniturs che ston tgirar sez lur uffants: Quai en il cas ch'els na pon betg pli lavurar, perquai ch'els ston tgirar ils uffants e n'avessan lura nagina paja. U er en il cas ch'els èn en quarantina perquai ch'il medi ha ordinà quai.
Ensemen cun il pachet da mesiras ch'il Cussegl federal ha decis ils 13 da mars, stattan actualmain a disposiziun radund 42 milliardas per l'economia.
Confederaziun ha ils meds finanzials
La liquiditad da las interpresas saja il mument il pli impurtant, ha declerà il minister da finanzas Ueli Maurer. Perquai hajan els decidì per in instrument simpel ed effectiv:
Quels che dovrian daners, possian ir tar lur banca da chasa. Quella possia dar ils daners necessaris per pajas, quints averts euv. La Confederaziun garanteschia per quests daners. Uschia possian ins evitar che la Confederaziun stoppia elavurar tuttas dumondas enina. La garanzia vala fin a 500'000 francs. Ultra da quai èsi previs che betg tuttas interpresas ston pajar lur taglia e taxas gist ussa.
Ils daners necessaris sajan avant maun, uschia il minister da finanzas. Quai tranter auter grazia als gudogns dals onns passads e l'uschenumnà «frain da debits».
Turissem e politica regiunala
Il mument ha la Confederaziun investì credits da radund 530 milliuns francs en projects – da quai radund 60% en il Turissem. L'administraziun da credits da la Confederaziun suprpiglian normalmain ils chantuns. Per garantir la liquiditad lubescha la Confederaziun da flexibilisar quests credits, vul dir era il termin cura ch'i èn da pajar enavos. Uschia po sur tut il sectur da pendicularas vegnir sustegnì. Pertge là fissan las amortisaziuns normalmain da pajar cun la fin da la stagiun.
