Rampas memia taissas, entradas memia autas. Il traffic public n'è per part betg accessibel a moda autonoma per persunas cun impediments. Quai deplorescha l'organisaziun Inclusiun Handicap.
Sco l'organisaziun per ils dretgs da persunas cun impediments scriva, vegnia la situaziun en il traffic public a cuntrafar a la lescha. Quella pretenda, ch'il traffic public è accessibel davent dal 2024 senza barrieras ed a moda autonoma.
![Konolfingen barrierefrei](https://www.rtr.ch/static/cms/images/960w/4438d20.jpg)
En vista a quai, saja cler ch'i na giaja betg vinavant cun l'accessibilitad senza obstachels. Inclusiun Handicap, l'uniun tetgala da las organisaziun per persunas cun impediments, pretenda plirs pass:
- Regulaziuns cleras e liantas: In termin final liant per l'adattaziun dal traffic public, sin il pli tard il 2030, e termins cun finamiras d'etappas liantas
- In gremi che surveglia quai che vischnancas e chantuns stgaffeschan
- Quai duai vegnir inclus en la revisiun da la lescha per persunas cun impediment
En il mument sajan 40% da las staziuns da tren e dus terz da las staziuns da bus accessibel a moda autonoma en Svizra, scriva Inclusiun Handicap. Servetschs da remplazzament sco bus na tanschian betg.
Per exempel prolungheschia in servetsch da bus il temp da viadi e la necessitad d'annunziar ordavant na fetschia betg pussaivel da nizzegiar a moda spontana il traffic public. Quai saja dentant pretendì da la lescha.
Co finanziar?
Davent dal 2019 surpiglia la Confederaziun ils custs cun il fond d'infrastructura da viafier. Ils meds en quel na tanschian dentant betg per bajegiar enturn il traffic public, scriva Inclusiun Handicap.
Tenor las Viafiers federalas custia quai radund 2,5 milliardas francs. Quai surpassa tenor Inclusiun Handicap ils meds finanzials en il fond per ils onns 2025-2028, e gest en quai temp duain las grondas midadas vegnidas fatgas. Il Cussegl federal stoppia perquai augmentar ils meds en il fond.
Plinavant fa Inclusiun Handicap er attent che sistems da pajar ed ils sistems d'infurmaziun na sajan per part betg utilisabel, u na gidan betg a persunas cun impediments d'udida.