Persunas cun impediments dovran vinavant agid en bleras staziuns da viafier en il Grischun. Tenor communicaziun da la Viafier retica èn actualmain pir 48 da 104 staziuns bajegiadas ora uschia che persunas cun impediments pon duvrar ellas senz'agid – pia gnanc la mesadad. La lescha davart l’egualitad da persunas cun impediments è ida en vigur avant 20 onns. En sasez stuess ella esser realisada sin la fin da l’onn.
Pertge n'èn las staziuns anc betg prontas?
I dettia duas raschuns: D'ina vart dettia bleras staziuns en regiuns stippas u en stortas. Quai engrevgeschia las lavurs. Da l'autra vart sajan bleras staziuns en in nausch stadi ed hajan en general in basegn da renovaziun e modernisaziun. Vi da numerus edifizis artifizials e vi da la rait da viafier ston vegnir fatgas lavurs da mantegniment da la substanza.
Qua sa resulta tenor la Viafier retica in dilemma: Per garantir in manaschi da viafier stabil na po il dumber da plazzals betg vegnir augmentà considerablamain. Il medem mument haja la segirezza per ils viagiaturs da tren emprima prioritad. I vala da chattar la ballantscha tranter ils projects da mantegniment da la substanza, quels da la lescha davart l’egualitad da persunas cun impediments, sco era d’in manaschi da traffic funcziunond.
Stadi da la realisaziun tar la Viafier retica
Da las 104 staziuns da la Viafier retica èn fin oz 48 dad ellas autonomas ed accessiblas per tuttas e tuts. Per 18 staziuns che na pon betg vegnir renovadas confurm a la lescha sin l’emprim da schaner 2024 poi dar mesiras transitoricas. Quai munta ch’i dettia agid da persunal, ina soluziun da manaschi u in servetsch da shuttle.
Quellas mesiras valian era per las 38 ulteriuras staziuns, nua che la renovaziun na saja betg ordinada or da raschuns da proporziunalitad. Tar quellas staziuns na vegnian las restructuraziuns betg sustegnidas finanzialmain da la Confederaziun.
