L'associaziun da las locatarias e dals locataris vul far ina fin als tschains ch'explodeschan ed a la mancanza d'abitaziuns pajablas. Ella pretenda perquai che la politica prendia mesiras cunter las renditas giganticas dals concerns d'immobiglias. En emprima lingia giaja per ina controlla dals tschains. Quai hai gì num ad ina conferenza da medias da l'associaziun.
I va per summas grondas
10,4 milliardas francs l'onn vegnia prendì davent a locatarias e locataris cun tschains abusivs. Il 2021 saja quai uschia stà per mintga chasada 370 francs mintga mais. Da la miseria sin il martgà d'abitaziuns na sajan entant betg mo pertutgadas persunas cun entradas bassas, mabain er la classa d'amez.
Cumbatter per ils dretgs
Il mument saja uschia ch'ils pertutgads stoppian sa dustar individualmain cunter ils tschains che creschan. Cunquai che quels dovrian però lur abitaziuns e sajan uschia dependents na gughegian blers savens betg dad insister sin lur dretgs. Perquai dovria in mecanissem da controlla dals tschains e da las renditas, pretenda l'associaziun da locatarias e locataris.
Or da l'archiv:
