A Turitg han ier saira radund milli persunas demonstrà cunter la mancanza d’abitaziuns en la citad. Tenor la Polizia da la citad da Turitg hajan demonstrants bittà crappa sin bajetgs ed autos. Ultra da quai hajan els donnegià fermadas da trams e vitrinas. Davart la summa da donn n’ha la polizia anc pudì far naginas indicaziuns concretas.
La demonstraziun davent dal Museum naziunal svizzer tras il quartier da la Langstrasse n’è betg stada lubida. Tuttina saja la polizia sa tegnida enavos. La demonstraziun è stada dus dis suenter che l’areal Koch a Turitg-Altstetten è vegnì rumì. Quest areal è stà occupà plirs onns.