Lavurar da chalira po augmentar il risico d’accidents avertescha la Suva, l’Institut svizzer d’assicuranza d’accidents. Sut talas cundiziuns possian ins esser pli stanchel e damain concentrà. Tenor statistica datti 7% dapli accidents tar temperaturas sur 30 grads celsius.
7 tips per dis da chalira
Per sa proteger da la chalira recumonda la Suva da:
- far grevas lavurs corporalas la bun’ura
- drizzar en zonas da sumbriva per lavur e pausa
- proteger il chau da chalira e da radis ultraviolets
- cuvrir la pel cun taila
- baiver mintga 20 minutas 2,5 dl aua per evitar in deficit da liquid
- far pausa regularmain en la sumbriva
- adattar il tempo da lavur al sentiment corporal
Suva cun nov program da prevenziun
La protecziun cunter il sulegl è impurtanta er en connex cun la radiaziun ultravioletta. En l’entira Svizra survegnan mintg'onn var 25’000 persunas l'uschenumnà cancer da la pel cler. 1'000 da quellas èn cas chaschunads a la lavur.
A partir da quest onn controllescha la Suva tar controllas da plazzas da lavur al liber, sche las mesiras da protecziun dad UV èn vegnidas realisadas correctamain.
Ultra da quai ha ella sviluppà in program da prevenziun che duai meglierar la diagnosa tempriva da cancer da la pel cler, per persunas ch'han lavurà onns a la lunga vi dal sulegl e ch'èn stadas exponidas a la radiaziun ultravioletta nuschaivla.
Or da l'archiv:
