Suenter il Gea tar la 13avla renta d'AVS è la dumonda da la finanziaziun anc averta. In'enquista da YouGov ha dumandà persunas en Svizra davart lur ideas preferidas, sco la «NZZ am Sonntag» rapporta.
Per 64% da las persunas dumandadas tutga ina taglia sin transacziuns finanzialas tar ina da las trais pli impurtantas ideas. Er da spargnar tar il militar e tar agid da svilup è stà popular (51% e 48% consentiment). Main popular è ina pli auta taglia da plivalur (27%), ina naziunala taglia d’ertar (40%) u ina pli auta deducziun da la paja (24%).
L'enquista ha er vulì savair las raschuns per il Gea. Cunzunt ils pli auts custs da vita e la povradad da la vegliadetgna èn stads las raschuns che mintgamai 75% e 64% han numnà sco ina da las trais pli impurtantas raschuns. 33% han ditg che la Confederaziun haja er daners per autras chaussas.
La realisaziun da la 13avla renta d'AVS vegn tenor calculaziuns a custar circa 4 fin 5 milliardas francs per onn. L'enquista è vegnida fatg sin incumbensa da la «NZZ am Sonntag» da YouGov, in institut internaziunal cun sedia en la Gronda Britannia. Dumandà en vegnids 1258 persunas, tenor la «NZZ am Sonntag» sajan ellas represchentativas tenor schlattaina, vegliadetgna e regiun.
