L'Uffizi federal da sanadad BAG ha uss installà ina hotline gratuita, per respunder dumondas da la populaziun areguard il virus da corona. Cuntanschibla è la hotline sur il numer 058 463 00 00. Ina hotline per persunas dal fatg (058 462 21 00) ed ina per persunas ch'entran en Svizra (058 464 44 88) vegnan avertas a partir da las 15:00, ha declerà il pledader dal BAG, Daniel Dauwalder.
Pervi dal dumber plitost pitschen da cas da suspect da virus da corona, na datti betg mintga di in update davart il dumber da cas, ha declerà Dauwalder. En cas ch'in suspect duess vegnir confermà, vegnia il BAG ad infurmar activ. Fin uss hai dà en Svizra total enturn 50 cas da suspect. Dapli davart quests cas, per exempel en tge chantuns ch'i sajan stads, na fa il BAG betg enconuschent.
Svizzers vulan turnar da la China
In tozzel burgais da la Svizra ch'èn actualmain en China spera da pudair turnar en Svizra. Il Departament per affars exteriurs EDA saja en contact cun quellas persunas, hai gì num sin dumonda da Keystone SDA. L'organisaziun per pudair turnar, saja dentant fitg cumplexa. La Svizra saja en contact cun divers pajais ed organisaziuns per ch'ils pertutgads possian turnar.
Pervi da las restricziuns che la regenza Chinaisa ha relaschà saja la situaziun en las regiuns pertutgadas fitg grevas. En tut sajan registrads il mument 4'156 Svizras e Svizzers en la China.
SRF ha gì contact cun ina studenta che sa chatta il mument a Wuhan en la citad ch'è serrada giu cumplet. Era ella spera da pudair turnar a chasa:
Svizra po far part dal sistem da preavertiment da l'UE
Er la Svizra dastga sa participar al sistem da pre-avertiment e reacziun da l'UE (EWRS) en connex cun il virus da corona. La cumissiun da l'UE ha dà suatientscha ad ina dumonda da la Svizra. In pledader ha confermà in rapport da l'emissiun 10vor10. Questa collavuraziun è limitada sin la durada da la crisa dal virus da corona.
Tar il EWRS sa tracti d'ina plattafurma, grazia a la quala pon infurmaziuns davart malsognas contagiusas vegnir tramessas immediat a las autoritads, scriva il Departament federal d'affars exteriurs en in fegl d'infurmaziun.
Plinavant ha la Svizra er tschentà ina dumonda per pudair sa participar al «Health Security Committee» da l'UE. Quest comité coordinescha mesiras tar malsognas contagiusas e baratta infurmaziuns. Sche la Svizra ha qua er gia survegnì ina conferma, n'è anc betg cler.
RTR novitads 11:00
