Ils cas en il Grischun s'augmentan marcantamain – actualmain èn 1'252 cas activs en il Grischun, quai èn passa dubel uschè blers sco oz avant in onn. Sis persunas èn sin la staziun intensiva e quatter da quellas dovran sustegn da respirar.
La situaziun sin las staziuns intensivas è tendida.
Mesiras pli severas
Sch'ils cas da corona s'augmentan vinavant, dovria mesiras pli severas, di Rudolf Leuthold. Da prender mesiras tenor regiuns ed ils cas activs na fa tenor el dentant betg bler senn.
Sche nus faschain in scumond d’ir giuador u 2G en ina regiun, van las persunas simplamain en in’autra regiun. Sch’ins vul far mesiras ston quellas valair dapertut ed esser coordinadas, sco en l’Austria.
Dentant betg mo en il Grischun èn ils experts preoccupads dal svilup, er sin plaun naziunal fa il svilup actual quittads.
Il hotspot scola
Cunzunt las scolas sajan actualmain in hotpost per novs cas. Entras las scolaras ed ils scolars chatta il virus lura la via tar las famiglias. Las cifras da record procuran er ch'il contact tracing vegn a ses cunfins. Ils contact tracers possian bain infurmar persunas positivas per sms, ma er contactar els per telefonin il medem di, na saja actualmain betg pussaivel. Ord quest motiv saja il schurmetg civil puspè en acziun. Fin la fin da l'emna quinta Rudolf Leuthold che la situaziun saja puspè sut controlla.
Certificat per persunas guaridas
A partir dals 16 da november pon ins ir per in certificat da corona sch'ins ha in test actual d'anticorpuls. Il certificat è lura valaivel per 90 dis en Svizra. La prelevaziun da sang po vegnir fatga en ina pratica da medis da chasa ubain en in'apoteca. L'analisa sco tala vegn fatga en in labor. La determinaziun d'anticorpuls custa e vegn cussegliada a persunas che supponan ch'ellas sajan vegnidas infectadas pli baud cun il coronavirus e che n'èn betg anc vaccinadas. Ina anc meglra protecziun datti, sch'ins sa lascha lura vaccinar ina giada. Lura survegnan ins in certificat ch'è valaivel per in entir onn.
