La recumandaziun uffiziala vegnia il mument elavurada. Ella duai esser pronta durant las proximas emnas, ha ditg il president da la cumissiun federala per vaccinaziuns, Christoph Berger. Fin lura duain tuttas persunas sur 65 onns s'annunziar per l'uschènumnà «booster». En il mument sajan ins vid las preperativas. Cler saja dentant che la terza vaccinaziun duai succeder pir sis mais suenter la segunda. Il booster na saja però nagina schliaziun per la pandemia.
La finamira è d'evitar grevas malsognas
La meglra mesira resta la vaccinaziun da basa. En il mument saja la quota da vaccinads dentant memia bassa. Ord quest motiv stoppian ins er quest enviern quintar cun ina sfida per il provediment da sanadad. Tenor Berger èsi bain pussaivel, ch'i dovra danovamain restricziuns per far frunt al svilup actual.
Nagina miracla da vaccinar
L'emna da vaccinar n'ha betg pudì persvader. Ils chantuns tiran per gronda part ina bilantscha mediocra. Tenor Rudolf Hauri, il president dals medis e las medias chantunalas è l'emna da vaccinar betg stada in grond success – ina «miracla da vaccinar» n'hai betg dà. L'emna da vaccinar haja dentant purschì la schanza d'infurmar areguard la segirtad da la vaccinaziun. Er vegnia l'emna ad avair consequenzas per il futur, ils chantuns na vegnian betg a laschar suenter. La vaccinaziun restia il pli impurtant med per far frunt a la pandemia.
