Nus tschertgain participantas e participants curaschus cun gust da l’aventura per nossa nova seria «Aventura Svizra – dal punct il pli bass al punct il pli aut da la Svizra». Sin quest viadi singular che maina da l’Insla da Brissago sin il Lago Maggiore fin al Piz da Dufour surmuntais Vus 6'000 meters d’autezza en 10 dis e quai ensemen cun autras aventurieras ed aventuriers da las differentas regiuns linguisticas da la Svizra.
Trais serias documentaras
Suenter il success da l’emissiun dad «Abenteuer Alpen», «Abenteuer Lappland» ed «Abenteuer Kilimanjaro» – trais serias documentaras da trais parts davart ina tura da skis alpina famusa, in viadi cun schlittas da huskies e l’ascensiun dal Kilimandscharo sin SRF DOK – producescha la SRG SSR quest onn ina nova seria d’aventura sin nivel naziunal.
La redacziun DOK da SRF sco era RTS, RSI e RTR planiseschan da traversar la Svizra davent dal punct il pli bass – l’Insla da Brissago – fin al punct il pli aut da la Svizra – il Piz da Dufour – e quai cuminaivlamain cun ina gruppa da quatter fin sis persunas e tranter ils 20 d’avust ed ils 10 da settember 2025. Las participantas ed ils participants cumenzan sin il stand up paddle, van cun velo da cursa e mountainbike, lura a pe ed a la fin cun charpellas e suga. Il viadi dura 10 dis.
-
Bild 1 von 7. Bildquelle: RTR.
-
Bild 2 von 7. Bildquelle: RTR.
-
Bild 3 von 7. Bildquelle: RTR.
-
Bild 4 von 7. Bildquelle: RTR.
-
Bild 5 von 7. Bildquelle: RTR.
-
Bild 6 von 7. Bildquelle: RTR.
-
Bild 7 von 7. Bildquelle: RTR.
Nus tschertgain dunnas ed umens, gugent era pèrins, da tutta vegliadetgna che planiseschan u che siemian gia daditg d’ina tala aventura. Vus stuais avair plaschair da la natira, perseveranza, cundiziun e gust d’As laschar en sin questa aventura singulara. Vus stuais viagiar ditg, esser ina persuna polisportiva, disponer d’ina experientscha da basa en l’auta muntogna ed As laschar en culturalmain sin tut las quatter linguas naziunalas per pudair star da cuminanza e sco team sin il pli aut punct da la Svizra, il Piz da Dufour.
4-6 persunas van sco gruppa
Nus tschertgain quatter fin sis persunas da las differentas parts da la Svizra che han gust e temp per questa aventura interculturala. Il viadi è planisà tranter ils 20 d’avust ed ils 10 da settember ed el dura 10 dis, tut tenor las cundiziuns da l’aura.
La gruppa vegn manada da trais guidas e guids da muntogna che derivan medemamain da las differentas parts dal pajais. Els èn responsabels per la segirtad, la tscherna da la ruta ed ils albierts da la gruppa.
Nus surpigliain ils custs dal viadi. Abstrahà dal stand up paddle è in equipament da basa persunal giavischaivel.
L’emissiun da la seria da trais parts è planisada per l’atun 2026. As interessescha l’aventura? Alura cumplettai il formular ed As annunziai.
Nus ans legrain sin Vossa annunzia – ed As contactain lura en il decurs da las proximas emnas.