La stad 2023 prenda Manuela Morgenthaler da Mustér ina decisiun che mida sia vita: ella vul ascender il Mont Blanc, il piz il pli aut da las Alps – ina sfida gigantica per Manuela che preferescha il canapé als chalzers da viandar e che n'ha anc mai fatg ina tura en auta muntogna. Il project vegn a metter sin il chau sia vita durant plirs mais.
Per fortuna na sto Manuela betg far persula il viadi aventurus. Sia sora pli giuvna Marina, in'alpinista cun passa 40 piz da sur 4000 m s.m. sin ses conto, daventa ses coach. Marina fa ir Manuela, senza esser preparada intensivamain na fiss la finamira betg mo nuncuntanschibla, mabain era privlusa.
Durant las preparativas ed ils trenaments sto Manuela midar plans: memia blers obstachels impedeschan la filmada sin il Mont Blanc en Frantscha. In grev mument. Ma ella vegn da s'arranschar cun la situaziun e sa focussescha sin ina nova destinaziun – cun la medema finamira: l'ascensiun dad in piz nunsurventschaivel per la Manuela d'avant 9 mais.
Tge ch'ha fatg bandunar sia zona da confort e d'ademplir prestaziuns sportivas maximalas è da vesair en la tschientavla reportascha da «rec.»
«rec.» sa numna il format nua che la reportra u il reporter piglia per mauns temas che fatschentan ella u el e la cuminanza. Ellas van là nua ch'i dat insatge da scuvrir u da revelar e mussan il mund uschia sco ch'ellas chattan el: vair, senza filter, recepì en il mument. «rec.» dat da discurrer, las tematicas èn cuntraversas e sveglian emoziuns.