Las reacziuns ad Andiast èn plitost negativas. Aschia è l’opiniun principala che trais onns e nov mais praschun per Pierin Vincenz saja memia ditg. La dretgira haja constituì in exempel cun questa sentenzia e praschun na saja betg giustifitgà.
Che Pierin Vincenz ha da pajar in chastì, cun gliez pon ils dumandads ad Andiast ir d'accord. Blers accentueschan dentant ch'el haja fatg bler dal bun per il vitg e la vischnanca e cura ch’ins vesia Pierin Vincenzs sin via, alura salidia el adina.
Mark Pieth beneventa la sentenzia
Il chasti saja pli rigurus che quai che blers observaders avessan spetgà. Quai constatescha il professor emerità da l'universitad da Basilea, Mark Pieth. Quai haja dentant era in connex cun las autas summas ch'il dus accusads principals han gudagnà cun lur cugliunarias: Pierin Vincenz e Beat Stocker duain avair profità da milliuns cun lur participaziuns zuppadas vid firmas che la Raiffeisen ed Aduno han silsuenter cumprà.
En general beneventa Mark Pieth che la Dretgira districtuala da Turitg n'ha betg declerà nunculpant Pierin Vincenz, sco quai che bleras persunas hajan spetgà durant e suenter il process.
