L'emna passada ha la Regenza grischuna decis da terminar ils tests da manaschis. Entras il svilup rasant da la varianta omicron sajan ils labors als cunfins, uschia ch'ins stoppia metter prioritads nua e co testar. Per las interpresas è questa decisiun vegnida nunspetgadamain. Uschia deplorescha la firma Hamilton, ina da las grondas patrunas dal Grischun, la decisiun. La pussaivladad da testar il persunal a moda rigurusa saja stada ina bun'opziun per chattar ed eliminar chadainas d'infecziun. Uss hajan ins cumprà tests svelts, per uschia almain pussibilitar al persunal da sa laschar testar.
Auter vesi or per exempel tar la Banca Chantunala Grischuna u la Polizia chantunala. Tras la decisiun dal chantun da stritgar ils tests da manaschi na porschan omadus manaschis betg pli tests al persunal. Quai na saja dentant er betg uschè tragic, suttastritga Walter Schlegel, il cumandant da la Polizia chantunala.
Il provediment da basa n'è betg periclità.
Gist tar la polizia, in'instituziun che sto adina funcziunar, fai dentant surstar ch'il chantun na porscha nagins tests pli. Schlegel sincerescha però che la Polizia chantunala fissia pronta da manar in agen reschim da tests, sche la situaziun sa pegiurass. Quai na saja en il mument dentant betg il cas. Il dumber d'infecziuns saja survesaivel, la situaziun en cumparegliaziun cun l'emna passada sa calmada.
Persunal en isolaziun, il manaschi funcziuna però
Medem vesi or tar la Banca Chantunala Grischuna, la situaziun actuala saja supportabla. Gist a l'entschatta da l'onn hajan els gì intgins cas da corona en fatschenta, tras il homeoffice na saja quai dentant betg stà in grond problem. Quai di Martin Brenn dal stab da crisa da la banca. Bain hajan els stuì serrar singulas filialas pervia da la mancanza da persunal, quai sajan però stadas excepziuns. Er haja dà roschadas da persunal, uschia che singuls emploiads hajan stuì midar per in curt temp lieu da lavur. Uss – cun las midadas da las reglas pertutgant quarantina ed isolaziun – saja la situaziun dentant puspè sa stabilisada.
Er l'AutoDaPosta n'ha per il mument betg pli gronds problems en il Grischun. L'emna passada hajan ins gì stretgas a Glion, ha confermà il pledader da medias da Posta, Urs Bloch, envers RTR. Entant sajan manischunzas e manischunzs puspè turnads enavos da la quarantina u l'isolaziun. Er qua è il resun fitg sumegliant a las autras interpresas: la reducziun dal temp d'isolaziun da 10 sin 5 dis gidia.
Il homeoffice è in sustegn
Er il homeoffice è per bleras interpresas in grond agid, conferma per exempel la Hamilton. En il mument dumbra l'interpresa radund 40 persunas en isolaziun u quarantina. Tar var 1'600 collavuraturas e collavuraturs ina cifra survesaivla. Plinavant possian blers dals pertutgads lavurar en homeoffice, perquai ch'els n'hajan strusch u insumma nagins sintoms. Sumegliant è la situaziun tar la Banca Chantunala Grischuna, nua ch'ils collavuraturs e las collavuraturas hajan adina gì la pussaivladad da lavurar en homeoffice. Il sectur da bancas ha natiralmain il cletg, ch'ins po far bler davent da chasa, sa er Martin Brenn dal stab da crisa.
Dapli cas tar l'Ospital regiunal Surselva
L'Ospital regiunal Surselva senta l'actuala unda da corona, dentant plitost tar il persunal e betg tar las ospitalisaziuns. En il mument hajan ins dus pazients da corona ed en consequenza saja er il squitsch sin il persunal supportabel. Er sch'i manchia forsa in u l'auter tgirunz e tgirunza, di la directura da l'ospital, Claudia Käch.
Tutgar lain, nus na savain betg sco'i vegn.
Sch'i avess tuttina da dar stretgas, hajan els gia pront strategias e mesiras. Previs fiss tranter auter il sustegn entras persunal da la glista chantunala per persunas da tgira, u entras il servetsch civil. En il mument na saja quai però betg necessari.
Tests fetschian els sco fin uss, ils ospitals dastgan e ston numnadamain cuntinuar cun ils tests regulars da manaschi. Sulettamain tar ils vaccinads hajan els stuì far reducziuns. Tenor il chantun dastgan quels be pli vegnir testads ina giada ad emna.
