Tge effect che l'unda d'omicron ha exact sin ils ospitals saja il mument anc grev da dir, uschia il minister da sanadad Peter Peyer. Las staziuns intensivas sco er las autras partiziuns sajan anc adina occupadas fitg. Augmentar capacitads na saja betg pussaivel, perquai ch'i na dettia betg dapli persunal, uschia Peyer. Sper quai stoppian ins er empruvar d'evitar che memia bler persunal da tgira crodia or il medem mument, pervia da malsogna ubain quarantina.
Obligatori da s'annunziar per persunas dal fatg
Per pudair gidar or en cas d'urgenza ha la regenza grischuna uss decis che persunas ch'èn scoladas en il sectur da tgira e lavuran betg ubain en in auter sectur, ston s'annunziar. Cun questas persunas supplementaras quinta il chantun da crear in zic spazi d'agir, sche l'unda actuala chaschunass stretgas da persunal.
S'annunziar ston tut las persunas dal sectur da tgira cun domicil en il Grischun che na lavuran betg en lur professiun e na fan betg part d'ina gruppa da ristga sa registrar.
Questa obligaziun saja pussaivla sin basa da la lescha da sanadad, communitgescha la regenza. Quel saja ussa necessari, perquei ch'i saja da quintar ch'il sistem da sanadad vegnia als cunfins cun la creschientscha d'infecziuns ch'ins quinta cuntut las proximas emnas. Cun ina tala creschientscha quintan era ils experts da la task force federala cunter il coronavirus.
