Novitads dals 29-10-2024 - Scandal da charn en praschuns da Cazas

• La mazlaria dal Stabiliment giudizial Realta ha declerà products da charn a moda insuffizienta. Quai demussan las analisas da l'inspecturat chantunal da victualias. Praschuniers avevan purtà plant. Ina prova d'ina liongia da charn bov ha demussà ch'ella cuntegneva era parts da charn-portg senza che quai fiss vegnì declerà. Pertutgada è era la praschun Tignez, gist sper la praschun Realta.

• L'onn passà è il dumber da las persunas ch'han retschavì agid social sa sbassà en media per 4,3%. Quai resulta d’ina retschertga che l’iniziativa da las citads per la politica sociala ha publitgà. En las bleras citads saja la quota d'agid social stada uschè bassa sco dapi onns betg pli. Quai grazia a la situaziun al martgà da lavur che saja positiva. La citad da Cuira haja nudà ina quota da 2,5%. En tut hajan 939 persunas retratg agid social en la chapitala grischuna.
• Il chantun surveglia pli intensiv ils tschiervs en Partenz en connex cun la malsogna da tuberculosa. La raschun saja ch'ins haja cumprovà la tuberculosa tar almain dus tschiervs en il Montafon en l’Austria, datiers dal cunfin grischun.

• Il schef trenader da l'EHC San Murezzan, Reto Kobach banduna la squadra sin la fin da la stagiun 2024/25. Kobach vegn a midar tar ina autra equipa nua ch’el vegn a s’occupar da la partiziun da juniors ed en il medem mument surpigliar il post dal manader tecnic. Tge club che quai vegn ad esser n'ha Reto Kobach anc betg pudì communitgar.
• La Posta vul dapli filialas cun partenaris. Er en l'avegnir vul ella mantegnair ils 2'000 uffizis postals servids. 170 da quels duain dentant vegnir manads ensemen cun partenaris, sco il schef Roberto Cirillo ha ditg avant las medias. La midada saja necessaria, perquai che la fatschenta saja sa midada. Dapi il 2010 saja il dumber da pajaments al spurtegl sa sminuì per prest 70%.

La survista dal di