La mazlaria dal Stabiliment giudizial Realta ha declerà products da charn a moda insuffizienta. Quai demussan las analisas da l’Inspecturat da victualias chantunal. Pervi d'ina denunzia penala da diesch praschuniers, in lavurava en mazlaria, sajan vegnids confiscads il settember nov products da charn bov tar ina perquisiziun da chasa en la praschun a Cazas. Quai ha ditg il manader da l'Uffizi chantunal per l'execuziun giudiziala, Mathias Fässler, il mardi davant las medias a Cuira.
Ina prova d'ina liongia da charn-bov ha demussà ch'ella cuntegneva parts da charn-portg senza che quai fiss vegnì declerà. Tar auters products na saja la charn-portg betg vegnida declerada suffizientamain. En ina talgia-bov hajan ins per exempel chattà 67% charn-portg, sco ch'il cusseglier guvernativ responsabel Peter Peyer ha ditg. Pliras persunas muslimas sajan stadas pertutgadas da la decleraziun fallada, sco l'Uffizi rapporta.
Insatge uschè na dastga betg capitar. Nus s'exculpain per quest schabetg.
Malprecaut u discriminant?
Da las passa 200 persunas en la praschun sajan in zic pli pauc che la mesadad persunas muslimas. Sche las faussas decleraziuns sajan stadas negligentas u derivian d'in motiv discriminant vegnia ussa sclerì da la procura publica, di Peter Peyer vinavant. Tenor Fässler saja vegnida averta in'inquisiziun penala cunter nunenconuschent.
Mesiras immediatas
La direcziun da l’Uffizi per l’execuziun giudiziala e la direcziun da l'instituziun deploreschan quai ch'è capità. Ellas hajan intensivà las controllas internas e suspendì ad interim la producziun en la mazlaria e retirian ad interim mo pli charn da furniturs externs. Il mazler responsabel saja vegnì dispensà.
