Novitads dals 21-12-2024 - Victoria dubla ed ulteriurs podests per la Svizra

• Sin la pista Saslong procuran ils skiunzs svizzers per in success dubel. Marco Odermatt ha gudagnà la cursa rapida, cun in avantatg da bunamain ina mesa secunda sin Franjo von Allmen. Plaz 3 fa l’American Ryan Cochran-Siegle. La cursa rapida è stada plain tensiun, sco las pitschnas differenzas da temp mussan. Auter che Odermatt èn ils top 30 stads fitg pauc in ord l'auter. Uschia ha Justin Murisier sco 29avel sulettamain pers 0,82 secundas sin il segund Von Allmen.

• En l'emprim dals dus super-G's da la cuppa mundiala a San Murezzan fa la Svizra Lara Gut-Behrami rang 2. Ella perda 18 tschientavels sin l'Austriaca Cornelia Hütter, ch'è stada la pli sperta sin la pista da la Corviglia.

• En la cuppa mundiala da snowboard a Tavau ha il Grischun Dario Caviezel fatg il segund plaz en il slalom parallel. Quai è ses 9avel podest en la cuppa mundiala da sia carriera. Victur è daventà l’Austriac Arvid Auner. Tar las dunnas ha la giuvna Grischuna Flurina Bätschi fatg il terz plaz. Per ella èsi l'emprim podest da sia carriera en la cuppa mundiala. Gia crudada ora en ils otgavelfinals è Larissa Gasser. Sisum il podest dal slalom parallel da las dunnas a Tavau è l’Ollandaisa Michelle Dekker.
• Tar l'attatga sin la fiera da Nadal a Magdeburg cun 5 morts e passa 200 blessads ha il delinquent supponì para utilisà la via da salvament per entrar la fiera. Radund trais minutas haja durà fin che la polizia haja arrestà quest um, ha la polizia communitgà. Il delinquent supponì saja stà malcuntent co che la Germania ha tractà ils fugitivs da l'Arabia Saudita, ha la procura publica communitgà suenter las emprimas investigaziuns. Tar las tschintg unfrendas sa tractia d'in uffant da 9 onns e quatter creschids. Tar il delinquent supponì sa tractia d'in medi da 50 onns da l'Arabia Saudita ch'è il 2006 fugì en la Germania. Tenor plirs rapports e tenor sias medias socialas descriva el sasez sco ex-muslim e saja cunter l'Islam.

Il di en survista