Lara Gut-Behrami ha sulettamain pers 18 tschientavels sin la sperta da la sonda, l'Austriaca Cornelia Hütter. Dasper Hütter e Gut-Behrami è cun Sofia Goggia in terz num bain enconuschent stà sin il podest a San Murezzan. Duas ulteriuras Svizras èn sa rangadas en las top 15 – cun rang 10 per Corinne Suter, e rang 15 per Michelle Gisin.
Ils detagls dals super-G's
Damaun dumengia suonda la segunda cursa rapida a San Murezzan. La cursa sin la Corviglia cumenza las 11.00.
Cundiziuns optimalas per far cursas
San Murezzan è sa preschentà la sonda en in stupent vestgì d’enviern. Suenter la naiv dals ultims dis è la pista da la Corviglia vegnida preparada per cursas da la cuppa mundiala. Dapi 25 onns dat quai cursas da la cuppa mundiala da skis a San Murezzan. Adina il december sa mesiran las meglras dunnas dal circus da skis sin la Corviglia. Dapi blers onns organisescha San Murezzan cursas da spertezza.
Diesch svizras e la gronda Lindsay Vonn
La pista da la Corviglia sur San Murezzan è per skiunzas svizras in bun lieu. A San Murezzan è ida si la staila da Lara Gut-Behrami. Ed en Engiadina ha per exempel er la campiunessa mundiala Jasmine Flury gia gudagnà il super-G. Ed er la campiunessa olimpica da la cursa rapida Corinne Suter ha gia pudì festivar plazzas da podest a San Murezzan. La pista da la Corviglia è uschia segiramain insatge per las skiunzas svizras. Mintg’onn puspè s’allegran ellas dad ir a la partenza da las cursas da chasa en Engiadina, e mintg’onn procuran ellas per buns resultats. Las grondas favuritas vegnan questa giada dentant da l’Italia. Sofia Goggia e Federica Brignone vegnan ad esser quellas che las Svizras e las ulteriuras concurrentas han da batter.
Return da Lindsay Vonn en la cuppa mundiala
Tut ils egls dals aspectaturs e da las aspectaturas a San Murezzan vegnan dentant er a sa drizzar sin il return da la gronda Lindsay Vonn en il circus da skis. Tschintg onns suenter che la skiunza americana aveva terminà sia carriera activa, è ella puspè enavos. Cun in nov schanugl e cun blera fiduzia en sasezza vul la skiunza da quaranta onns anc ina giada savair. Ella parta per ses emprim super-G da la stagiun cun il numer 31.
