Sin la dumonda quant svelt ch'ina vischnanca dastga relaschar ina zona da bajegiar, datti ina resposta clera. Davart la dumonda da prolungar ella: Quella dumonda daventa ils proxims onns pavel per giurists e dretgiras.
Schlarigna ha reagì correct
L’emna passada ha la suprastanza communala da Schlarigna decidì svelt e surprendentamain da relaschar ina zona da planisaziun. La finamira: Impedir ch'adina dapli abitaziuns primaras vegnan bajegiadas enturn en abitaziuns da vacanzas.
In investur che planisava da midar 22 abitaziuns primaras en abitaziuns da luxus, na po cun quai betg realisar ses plans ils proxims onns. Ma dastga la vischnanca insumma decider tut a la bahuta ina tala zona?
Gea, per regla ston ins relaschar svelt ina zona da planisaziun.
I sa tractia dad in instrument per impedir ch’ils plans d’ina vischnanca vegnian sutminads. Ed i saja pia necessari da reagir svelt, «avant ch’igl è memia tard». Quai di Alain Griffel, professer per dretg da construcziun e planisaziun da territori a l’Universitad da Turitg. Plinavant prevedia la lescha d’abitaziuns secundaras che chantun e vischnancas possian prender mesiras, sche memia bleras abitaziuns primaras vegnian midadas en abitaziuns da vacanzas.
Prolungar zonas da planisaziun
Var 60 vischnancas grischunas han da dezonar ed han perquai relaschà zonas da planisaziun – e prolungà quellas. Glion ha gia prolungà duas giadas, uschia che la zona da planisaziun cuzza tut en tut sis onns fin il 2024.
Per proprietarias e proprietaris cun sulom en ina tala zona munta quai, ch'igl è nunpussaivel da bajegiar chasa. Vitiers vegn l’intschertezza sche l'agen terren perda forsa massivamain valita.
Quant ditg dastga ina tala situaziun cuzzar? Fin tschintg onns preveda la lescha federala per ina zona da planisaziun e la lescha lubescha era prolungaziuns. La lescha grischuna è pli stricta e preveda dus onns per zonas da planisaziun – medemamain cun la pussaivladad da prolungar. Ma quant ditg dastgan las prolungaziuns cuzzar?
Ils proxims onns ston dretgiras decider
Gist per redimensiunar zonas da bajegiar sajan dus onns segir memia pauc, di Alain Griffel. Dezonar saja in problem tut spezial – cunzunt perquai ch’il parlament n'haja betg definì co indemnisar ils proprietaris.
Sempitern na dastgan ins dentant betg mantegnair talas zonas.
Las zonas violeschian numnadamain la garanzia da proprietad. Insacura na saja quai simplamain betg pli commensurà. Cura che quai è – suenter otg, diesch u dudesch onns – na po Griffel betg dir. Ma el quinta che las dretgiras na tolereschan suenter ina tschert temp naginas prolungaziuns pli.
