Il president ucranais Wolodimir Selenski vegn l'emna proxima al Forum mundial d'economia a Tavau. Quai han ils organisaturs annunzià. El vegnia tranter auter a far in pled e sa participar ad in inscunter cun CEOs, uschia ina pledadra dal WEF. Igl è l'emprima giada che Selenski visita la Svizra dapi l'attatga da la Russia sin l'Ucraina il favrer avant dus onns. Avant in onn è sia dunna, Olena Selenska, stada al WEF , Selenski sez ha fatg in pled virtual.
60 schefs da stadi
Selenski è in da passa 60 schefs da stadi che visitan l'emna proxima il WEF. Sper il president ucranais vegnan era il primminister chinais Li Qiang, il president israelian Isaac Herzog ed il president franzos Emmanuel Macron a Tavau. Plinavant era la presidenta da la cumissiun da l'Uniun europeica, Ursula von der Leyen, ed il secretari general da l'ONU, António Guterres. Dals Stadis Unids da l'America vegnan Antony Blinken, minister da l'exteriur e Jake Sullivan, cussegliader naziunal da segirtad.
La Svizra vegn represchentada da la presidenta da la Confederaziun, Viola Amherd e plirs cussegliers e cusseglieras federals.
«Rebuilding Trust»
Il Forum mundial d'economia ha lieu per la 54avla giada, e cuzza dals 15 fin als 19 da schaner. I vegnan spetgads 2'800 participants e participantas, represchentants da passa 100 regenzas, sco era schefs d'interpresas ed organisaziuns socialas.
Il WEF da quest onn ha il tema «Rebuilding Trust» – puspè crear fidanza. I vegn concret discutà davart la cooperaziun en in mund fragmentà, stgaffir plazzas da lavur e co ir enturn cun intelligenza artifiziala. Era il clima, l'ambient ed il provediment d'energia vegnan ad esser temas.
