Tar Maurus Felber cumenzan las emprimas lavurs per il WEF schon il settember. Lura survegnan els var 150 dumondas da construcziun. El è inspectur da construcziun a Tavau ed è uschia responsabel per che las dumondas vegnian permessas e che tut vegnia suenter fatg correct. Gia il december èn grondas construcziuns vegnidas fatgas a Tavau. En l’emprima emna da schaner vai vinavant cun tut las construcziuns sin terren privat. Quai fa senn, pertge durant questa emna èn anc en viadi blers giasts a Tavau ed uschia è la vischnanca chargiada. Pia pon bleras butias anc restar avertas durant questa emna.
Sch'ils gronds camiuns èn sin via e blocheschan ils passapes, han las persunas da chaminar ziczac e quai n'è betg agreabel.
Uschia cumenzia pir in’emna avant il Forum economic mundial cun las lavurs sin via, sin ils passapes ed en butias. Mirco Lietha è responsabel da project dad intginas construcziuns per il WEF. El sto guardar che tut va correct è surtut era che tut vegn fatg ad ura.
La pli gronda difficultad è la logistica, cun quai che nus avain fitg bleras furniziuns. Pia che tut ils camiuns èn qua il mument gist e che tuts han plaz e stattan en il dretg lieu.
I po vegnir stretg sin la Promenada a Tavau, per quai n'hajan betg tuts encletga.
