L'iniziativa cunter la chatscha speziala ha ina lunga istorgia. Qua ils puncts culminants:
- Avust 2013: Ils set iniziants inoltreschan l'iniziativa cun in record da 10’229 suttascripziuns valaivlas. L'iniziativa vul abolir la chatscha speziala e persuenter prolungar la chatsch'auta per maximal 4 dis. Il dumber da selvaschina duai vegnir regulà durant la chatsch’auta. La chatscha duai esser il settember ed october e finir il pli tard il prim da november.
- Avust 2014: In onn pli tard vesi ora mal per l'iniziativa. La regenza propona da declerar ella sco nunvalaivla. L'iniziativa cuntrafetschia al dretg federal. La regenza declera: senza la chatscha speziala s'augmentass il dumber da tschiervs massivamain e quai cuntrafetschia a duas leschas federalas, quella da chatscha e quella da guaud.
- Favrer 2015: En la sessiun dal favrer tracta il Cussegl grond l'iniziativa. Il Cussegl grond suonda a la missiva e declera nunvalaivla l’iniziativa cun 79 cunter 36 vuschs.
- Mars 2016: Ils iniziants fan recurs. L'iniziativa va pia la via giuridica, dentant er la dretgira administrativa dal Grischun refusa il recurs dals iniziants e declera l'iniziativa sco nunvalaivla.
- November 2017: Lura suonda ina victoria per ils iniziants . Il Tribunal federal a Losanna accepta il recurs dals iniziants e declera l'iniziativa sco valaivla.
- December 2017: Mario Cavigelli sa perstgisa publicamain . Il cusseglier guvernativ aveva dumandà l'Uffizi federal per ambient per in'analisa da l'iniziativa. Lez avevan declerà ella sco valaivla. Il resultat n'èra dentant betg vegnì preschentà. Mario Cavigelli haja valità fauss la situaziun. El haja valità ils documents sco betg uschè relevants.
- December 2018: Il Cussegl grond sto tractar ina segunda giada l'iniziativa. La finala propona il Cussegl grond da dir NA a l'iniziativa quai cun 96 cunter 1 vusch.
- 19 da matg 2019: Suenter bun sis onns vegn decidì davart l'iniziativa a l'urna.
RR actualitad 12:00