Dacurt è vegnì enconuschent ch'il cusseglier guvernativ Mario Cavigelli (PCD) aveva dumandà l'Uffizi federal per ambient per ina analisa da l'iniziativa che vul abolir la chatscha speziala en il Grischun. Il BAFU aveva respundì ch'el valiteschia l'iniziativa sco valaivla. Questa posiziun n'ha Mario Cavigelli dentant betg preschentà a la cumissiun per ambient, traffic ed energia. El haja valità quest document sco betg uschè relevant , ha ditg Cavigelli avant in'emna ad RTR.
«Jau ma perstgis tar la cumissiun e tar il Cussegl grond»
Oz è Mario Cavigelli sa perstgisà per ses agir. El haja valità fauss la situaziun ed avess stuì infurmar la cumissiun davart la posiziun dal BAFU, uschia Mario Cavielli en ses pled uffizial en il Cussegl grond. El ha dentant era accentuà ch'el n'haja mai vulì zuppentar insatge u manipular la discussiun.
Naginas consequenzas
La cumissiun ha condemnà vehementamain l’agir dal cusseglier guvernativ. Quai ha il president Walter Grass (PBD) accentuà en sia replica sin la perstgisa dal cusseglier guvernativ. Ils commembers da la cumissiun han dentant acceptà la perstgisa.
Era la PPS ha engrazià a Mario Cavigelli per ses pleds sincers ed averts. Il schef da fracziun Jan Koch aveva smanatschà cun ina PUK - ina cumissiun che duai investigar en chaussa. Cun la perstgisa saja questa pretensiun dentant giud maisa, uschia Jan Koch.
Chatscha speziala vegn avant il pievel
Cunquai ch'il Tribunal federal a Losanna ha decis che l'iniziativa che vul abolir la chatscha speziala na cuntrafa betg al dretg federal , sto quella vegnir en votaziun. La regenza haja ussa in onn temp per preschentar in messadi al Cussegl grond, ha declerà Mario Cavigelli la mesemna. Concret sto quai succeder enfin il pli tard ils 29 da november 2018. La regenza grischuna veglia dentant far vinavant e tractar tant pli spert l'iniziativa.
RR novitads 10:00