La regenza grischuna ha approvà in project per ina protecziun cunter bovas en la vischnanca da Poschiavo. Quai scriva il chantun en ina communicaziun. Per quest intent garanteschia ella ina contribuziun chantunala da 132'000 francs ed ina contribuziun federala da 115'000 francs. Ils custs totals dal project muntian a 330'000 francs.
La finamira dal project «Protecziun cunter bovas Sassalbo» è da garantir la protecziun dal territori abità. Plievgia ferma chaschuna adina puspè bovas al pè da la muntogna Sassalbo en la vischnanca da Poschiavo. Las ultimas giadas è quai stà il cas ils 13 da fanadur 2023 sco er ils 5 da zercladur 2018.
Per franar las grondas quantitads da glera che pudessan crudar u glischnar duai il terren vegnir splattà en tscherts lieus per pudair construir rempars da terra natirals. Quels rempars duain vegnir rinforzads cun blocs da crappa.
