La cumbinaziun da plirs facturs ha manà tar la ferma plievgia en il Grischun e surtut en la Mesolcina. Tenor Daniela Schmuki da SRF Meteo saja la vart dal sid da las Alps savens pertutgada pli ferm: «Il vent chaud vegn savens dal sid tar nus, e pli chauda che l'aria è, dapli umiditad ch'ella ha. La vart dal sid da las Alps è quasi predestinada per grondas massas da plievgia.»
Plinavant era l'aria fitg umida in motiv e vitiers haja anc dà ina front fraida en las valladas dal sid. Tras quai hai pluvì fermamain ed igl è vegnì tar urizis. «Tgenina da las valladas ch'i tutga exact è dentant grev da dir ordavant», di Schmuki.
E questa giada hai tutgà fermamain il Mesauc: «En dus dis èn bunamain 125 milimeters plievgia vegnids ensemen. Per Grono è quai en media bunamain 80% da la plievgia dal zercladur. Era problematic èsi stà ch'igl ha il venderdi saira dà 60 millimeters plievgia aifer in'ura.» Tanta plievgia è extraordinari. Tenor Daniela Schmuki capita quai be mintga pèr decennis.
Ils proxims dis sa quieteschia l'aura en il Grischun. Mardi fin gievgia fa SRF Meteo quint ch'i savess mintgadi vegnir a plover, però betg ferm. La fin d'emna pudessi dar pli ferms urizis, quai vala er per la Mesolcina.