Suenter ch'in dals lufs dal Calanda è vegnì sajetta illegalmain e deponì a Seglias en la Tumleasca ils 16 da mars, vuleva il chantun sajettar be pli in dals radund 10 lufs al Calanda.
Cunquai ch'ils lufs èn dentant sa cumportads main problematic l'enviern passà cumpareglià cun ils ultims dus onns na sajan las cundiziuns per pudair sajettar in luf betg stadas ademplidas ha ditg l'inspectur da chatscha grischun, Georg Brosi.
Trais puncts avessan stuì esser ademplids per pudair sajettar in dals lufs:
- ils lufs avessan stuì s'avischinar a vitgs
- latiers esser ensemen en il triep
- e quai durant il di
Che quai n'è stà il cas ni en il Grischun ni en il chantun S. Gagl, è tenor Georg Brosi d'attribuir al fatg ch'i haja navì tard e pauc quest enviern. Perquai na sajan ils tschiervs betg s'avischinads als vitgs ed uschia er betg ils lufs sco lur chatschaders. I n'haja uschia betg dà situaziuns criticas sco ils ultims dus onns.
Il chantun conferma cun quai la posiziun da la Gruppa Luf Svizra ch'è da l'avis ch'ils lufs dal Calanda na sajan nagin problem.
Vinavant sco fin qua
Il chantun n'ha tenor Brosi betg previs dapli controllas al Calanda. Ils lufs vegnian observads sco fin qua. Sch'il chantun vegn puspè a dumandar la Confederaziun per ina lubientscha da sajettar lufs giuvens dal triep dal Calanda dapendia sch'i dettia pitschens. Quai saja necessari per insumma pudair far la dumonda a la Confederaziun.
