Cler è tenor l'Uffizi da chatscha grischun ch'insatgi ha sajettà il luf cun plirs sajets cun ballinas. Tenor las emprimas investigaziuns sa tracti d'in luf masculin naschì il 2015 ed è vegnì sajettà avant in pèr dis. Sch'i sa tracta dad in luf dal triep dal Calanda n'è anc betg cler, dentant probabel.
Sin basa da la situaziun ch'il cadaver è sut ina punt da la via dal Schin, e da la situaziun al lieu, suppona l'Uffizi da chatscha ch'il luf saja vegnì sajettà insanu'auter. Il tiradur haja lura dismess il cadaver là.
Nus essan absolutamain cunter fraudular lufs!
Lufs en il Grischun
Il cadaver ha il chantun tramess a l'Institut patologic da l'universitad da Berna per examinaziuns forensicas pli exactas. L'Uffizi da chatscha chantunal ha fatg ina denunzia penala encunter nunenconuschent, e la Procura publica grischuna investighescha. Cura ch'ins po spetgar emprims resultats n'ha po Georg Brosi betg pudì dir.
Consequenzas per ils lufs dal Calanda
Perquai ch’i sa tractia dal luf sajettà probabel dad in da la rotscha dal Calanda, veglia ins sajettar mo pli in giuven luf da la rotscha – e betg pli dus. Quai ha l'inspectur da chatscha grischun Georg Brosi confermà envers l'agentura da novitads sda.
RR novitads 10:00/12:00