Il Grischun ed il Principadi da Liechtenstein èn enfin ussa libers da la tuberculosa da tschiervs. Ma las autoritads grischunas guardan cun quitads en direcziun dals guauds dal Voralberg. La raschun: En l'Austria datti adina puspè tschiervs che han la malsogna cronica ed infecteschan er animals da niz, principalmain vatgas.
Dus differents sistems da chatscha
Il corpus delicti è tenor il veterinari chantunal Giochen Bearth, ch'ins pavla en ils reviers da chatscha austriacs la selvaschina durant l'enviern. Il problem: Là nua ch'i vegn pavlà, vegnan blers tschiervs ensemen e la tuberculosa po sa derasar bain. Cuntrari al Grischun – nua che il sistem da chatscha vegn controllà dal stadi e nua ch'il pavlar selvaschina è scumandà – enconuscha l'Austria la chatscha da revier ed ils possessurs dals reviers èn libers da pavlar u apunta betg.
RTR actualitad 12:00
