Adrian Arquint, il manader da l'Uffizi da chatscha e pestga, para cuntent cun la decisiun da l'uffizi federal.
Quest onn avain nus propi vesì, ch'in triep mussa in cumportament problematic. Els èn ids sur saivs. Là ston ins intervegnir. Quai prescriva er la lescha.
Emprovas da DNA han mussà ch'il luf masculin creschì or da quel triep ha stgarpà questa stad almain 15 chauras en la regiun Mantogna e Stussavgia. Cun quai saja la limita che classifitgeschia il cumportament dal triep da lufs sco «problematic» vegnida surpassada.
Gia l'onn passà era il luf masculin dal triep crudà si negativ, cura ch'el aveva stgarpà ina rotscha nursas sin la Stutzalp sur Spleia. Il cumportament saja uss vegnì dà vinavant als pitschens. Era lufs da quest triep han, tenor l'Uffizi da chatscha, probablamain attatgà e stgarpà questa stad in quart da la muntanera da nursas sin l'Alp Pitasch.
Co vinavant?
Tenor Adrian Arquint sa prepara l'uffizi uss per sajettar ils quatter lufs. Quai na vegnia betg ad esser simpel, manegia el. Per els saja uss fitg impurtant, ch'els possian reagir svelt. Ils giuvens creschian numanadamain fitg spert.
La gronda difficultad da quest'acziun è, da differenziar ils lufs giuvens dals lufs vegls. Quai vegn adina pli difficil sch'i vegn enviern.
Cunter la lubientscha pon las organisaziuns d'ambient anc far recurs aifer ils proxims 30 dis. Tenor il manader da l'Uffizi da chatscha na spetgan ins dentant betg quels 30 dis per cumenzar lur acziun.
