Tge han la skiunza da cursa Michelle Gisin, la golia da ballape Gaëlle Thalmann e la giugadra da tennis Belinda Bencic communabel? Cler ellas èn tuttas sportistas d'elita. Ed ellas han probabel anc bler auter cuminaivel. Ma l’aspect che nus manegiain è, ch'ellas tuttas treneschan orientà a lur ciclus e ch’ellas na fan nagin tabu ordlonder.
Il tema «ciclus e menstruaziun» è damai arrivà er en il sport da prestaziun internaziunal. Adina dapli sportistas d'elita, anteriuras atletas, trenadras e trenaders, medias e medis s’expriman publicamain en quest connex. Ed er l'associaziun tetgala da sport Swiss Olympic metta accents specifics per las dunnas cun il project «Dunna e sport d'elita». E quai ha er in’influenza sin la scena da sport grischuna.
Ditg han sportistas da prestaziun trenà medem sco lur collegas masculins. Ma i dat ina differenza essenziala che ha influenza sin il livel d'energia d'ina dunna: il ciclus. La durada dal ciclus sa variar, en media va el 28 dis e cumenza mintgamai cun l’emprim di da la perioda. E quel ciclus po gist tar sportistas avair in grond effect sin lur prestaziun.
L'anteriura trenadra da ski alpin – Selina Fravi
Ina che ha pussibilità gia avant plirs onns da trenar orientà al ciclus, è Selina Fravi. Ella è stada trenadra tar il center da prestaziun naziunal ost da ski alpin. In trenament orientà al ciclus veseva or tar ella suandantamain:
Durant las duas emnas al mais che la dunna aveva fitg blera forza avain nus trenà las chaussas che dovran forza. E durant las duas emnas che la sportista era pli flaivla avain nus fatg lavur da basa ubain regeneraziun.
Il principi dal trenament orientà al ciclus è che vegn trenà en accord cun ils ormons. Uschia pon ins trair a niz meglier ils agens auts durant il ciclus e vegn er a frida pli bain cun ils bass. Tar ils ormons giogan estrogen e progesteron rollas impurtantas. Lur si e giu durant il ciclus influenzescha tant la prestaziun corporala sco er il bainstar. Mintgatant prenda quai l'energia e mintgatant datti ella. Tut tenor fasa dal ciclus.
Tenor l'anteriura trenadra da skis, Selina Fravi, hajan la gronda part da sias atletas sentì la midada da trenament.
Il trenader d'unihockey – Simon Zopf
Er il club d'unihockey Piranha Cuira ha scuvert il trenar orientà al ciclus e vesa quai sco avantatg envers autras squadras. Las giugadras planiseschan lur trenament persunal individualmain. Uschia sa confrunteschan ellas dapli cun l’agen ciclus, damai che mintgina enconuscha ses agen corp il meglier. Dad er prender resguard tar ils trenaments da team saja grev en in sport da squadra, per lez na haja il trenader, Simon Zopf anc nagina schliaziun.
Entras la midada da trenar, vesa il trenader da Piranha Cuira, Simon Zopf, enfin ussa dus effects. In ha da far cun las blessuras. Gist en la segunda mesadad dal ciclus fa l’ormon progesteron pli lom ils lioms. Tge che augmenta il privel per sa far mal.
Jau hai il sentiment ch'il risico da sa blessar è ì levamain enavos. Ed il segund punct è che jau hai il sentiment che las atletas sa sentan pli sustegnidas e stimadas.
In effect sin ils resultats sa Simon Zopf il mument anc betg evaluar. Per quai fetschia Piranha Cuira anc memia pauc ditg quella sort da trenament. El manegia ch’el haja mirveglia tge effect che quella midada da trenament ha per il futur. Ed er sch’ins vegn a vesair ina differenza tranter las giugadras che han in ciclus natiral e quellas che han ina prevenziun entras ormons, sco la pirla.
La giugadra da hockey sin glatsch – Sandra Schmidt
Sandra Schmidt è giugadra tar las HCD Ladies. Er ella e sia squadra treneschan cun resguardar il ciclus. Per ella saja i stà grev pli baud da metter a lieu las variaziuns en l'atgna prestaziun. I possia gist mentalmain esser grev sch'ins dat la prestaziun sco uschiglio e vegnia da far mo la mesadad.
La dunna è e resta uschia sco ch'ella è. Ella ha ses ciclus ed i fiss bel sche quai vegniss er resguardà en stufas pli bassas.
Ella haja vis cun midar en in club professiunal ch'il tema ciclus vegnia ussa tractà pli avertamain cun las collegas da squadra e cun ils coachs, che avant. La dunna giuvna spera che quella avertadad ed in trenament orientà al ciclus daventia en futur insatge ordinari, tuttina en tge club e sin tge nivel ch'ins gioghia. Il temp vegn a mussar sch'il giavisch da Sandra Schmidt va en vigur.
