La serrada da l'A13 tar Lostallo ha cunzunt era consequenzas per il traffic en la Surselva. Tenor l'Uffizi da construcziun bassa dal Grischun, haja marcantamain dapli traffic dapi la fin d'emna passada. Uschia vegnia l'uffizi a prender mesiras, di l'inschigner chantunal, Reto Knuchel.
Venderdi, sonda e dumengia vegnan installà posts per dosar il traffic. Quels funcziunan sumegliant sco ils posts da guntgida per lung a la N13. Ins haja fin uss fatg bunas experientschas cun questa metoda. Da quests posts duai dar las fins d'emna tar Trun, Sumvitg e Mustér.
Tar l'axa da traffic tranter Tusaun, il Pass dal Güglia e l'Engiadina quinta l'Uffici da construcziun bassa era cun dapli traffic. L'uffizi è perquai era là vida planisar mesiras en ils lieus ch'han passadis pli stretgs.
Uschia vul la Confederaziun evitar chaos da traffic en Svizra
La Confederaziun saja en contact cun tut ils responsabels – saja quai chantuns, uffizis ubain pajais vischins. Quai ha Albert Rösti ditg mardi davant las medias. Ina mesira: Las notgs nua ch'il traffic da rauba na possia betg passar tras il Gottard vegnan schliadas per questa e proxim'emna. Uschia duai la capacitad vegnir augmentada. Ins desista dentant da schliar dal tuttafatg il scumond da traffic da notg e da la dumengia. Quai na gidass betg, cun quai che charrar tras la Svizra vegniss cun quai pli attractiv. Er ina taxa per passar tras il tunnel na saja nagina opziun.
Ils vitgs en il chantun Uri duain dentant tuttina esser accessibels. Plinavant porschan las Viafiers federalas durant las fin d'emnas ulteriuras colliaziuns. Uschia duai dar var 11'000 plazzas supplementaras – surtut persunas che van en vacanzas duain nizzegiar quella purschida.
Plinavant ha la Confederaziun gia fatg attent sin las alternativas: pia l'autostrada A2 e las vias sur il pass dal Simplon e Grond Sontg Bernard. Ulteriuras mesiras vegnian anc consultadas.
Lavurs da sanaziun han cumenzà
La fin d'emna passada haja mussà ch'ins na possia betg dominar la natira. Las dimensiuns dal eveniment sajan gronds.
Tranter Lostallo e Mesocco è l'autostrada donnegiada, perquai ch'ina bova ha manà enturn il flum. Quel haja lavà or la terra sut la via sin in tschancun da 200 meters. Ina part da la via è crudada davent. Fin la fin da l'emna quinta l'Uffizi federal da vias da pudair manada enavos la Moesa en ses vegl letg dal flum. Pir lura pon ins cumenzar cun las lavurs vid la via. La finamira: En var in mais duai la via puspè esser charrabel sin mintgamai in vial.
