En tschertas regiuns prevesa il chantun er da far tests da massa. I sa tracta d’in project pionier en Svizra. En las regiuns Malögia (regiun turistica gronda), Bernina (blers cas) ed Engiadina/Val Müstair vegn testada l’entira populaziun – quai sin basa voluntaria. Ils tests da massa vegnan a succeder tranter ils 11 e 13 da december cun agid da la protecziun civila e dals pumpiers.
Cun ils tests da massa vul la regenza survegnir in maletg da la situaziun mumentana da las persunas sintomaticas. En pli vul il chantun sa preparar cun il project da pilot da pudair far tests da massa sin la surfatscha da l’entir chantun – sche quai daventass necessari.
Ils detagls davart ils tests da massa n'èn anc betg enconuschents. Quels vegnan elavurads aifer la proxima emna. Uschia ha Peter Peyer respundì ina dumonda d'in schurnalist.
Sin la dumonda sch’igl è realistic da sbassar las cifras d'infecziun aifer duas emnas, respunda la media chantunala Marina Jamnicki: Gea. Ins stoppia dentant resguardar l'entir pachet da mesiras. En in emprim pass vegnia bain a dar dapli cas (test da massa). Però possian quellas persunas lura restar en quarantina, uschia ch’ins possia interrumper chadainas d’infecziuns. Resguardond l’entir pachet da mesiras sajan las autoritads persvasas ch'ellas portian l’effect giavischà.
Tests sistematics
En pli duain collavuraturs e collavuraturas da tscherts manaschis vegnir testads sistematicamain e periodicamain. Pertutgads èn manaschis da telefericas u d’hotellaria, professiuns da sanadad, persunas d’instrucziun u autras gruppas persunalas ch’han blers contacts socials. Er visitadras e visitaders da chasas da tgira u ospitals vegnian testads sistematicamain.
La finamira saja d’identifitgar persunas asintomaticas – vul dir persunas ch’èn s’infectadas cun il coronavirus che mussan però nagins sintoms.
Tge di la populaziun en Engiadina?
Las reacziuns dals Engiadinais e las Engiadinaisas sin via mussan, che la gronda part da la populaziun è pronta da far quels tests er sch'els sa sentan fit e saun. Ils dumandads en mintga cas èn da l'avis che quai saja ina buna chaussa.