«La PPS è schoccada da las mesiras senza plan da la regenza», scriva la Partida populara en ina communicaziun. Ella crititgescha la brev – che las ustarias han survegnì dal minister d'economia, Marcus Caduff – che prescriva da serrar las portas per duas emnas. Cun questa mesira duain las cifras d'infecziuns vegnir sminuidas e la fatschenta da Nadal spendrada.
Per la PPS na saja quai betg ina mesira plausibla – «las ustarias han concepts da protecziun che funcziunan e nus na savain betg, sche quellas mesiras gidan lura er propi da spendrar la fatschenta da Nadal», agiunta Hug. Anc pli fitg crititgescha la partida, che la decisiun saja vegnida tratga dad in di sin l'auter.
Kevin Brunold, il president dals cristiandemocrats grischuns è dentant da l'avis, ch'ins haja cun guardar sin ils auters chantuns schon pudì quintar cun ulteriuras mesiras. Ed el haja fidanza en la regenza, che quai saja stà la dretga decisiun. «Perquai che nus stuain exnum spendrar la stagiun d'enviern, sche nus stuain desister sin quella, ha il chantun in problem.»
In zic tranter quels pols da crititgar ubain beneventar las mesiras da la regenza è la partida da l'economia dals liberaldemocrats. «Il chantun ha segiramain er simplamain dà suenter al squitsch da la Confederaziun. Dentant è il squitsch er grond da spendrar la fatschenta da Nadal», di Bruno Claus, il president da la PLD grischuna.
