La gievgia suentermezdi haja ina persuna ch'è sa dada ora sco collavuratura da la procura publica – telefonà ad in pèr maridà a Cuira. Quai communitgescha la polizia chantunala il venderdi. Lur figl haja chaschunà a Basilea in accident mortal e saja en arrest d’inquisiziun, haja la persuna pretendì. Per evitar in lung chasti d’arrest haja la cugliuna pretendì in'auta cauziun. In um nunenconuschent haja la finala retschavì ils daners en la citad. Sco la polizia scriva, èn sis ulteriuras emprovas da cugliunaria betg reussidas.
Ina mascha enconuschenta
Ils scrocs u las scrocas pretendan dad esser u policist/policista u collavuratura/collavuratur da la procura publica, e pretendan ch’in parent haja chaschunà in grev accident. Els dumondan plirs dieschmillis francs e fan grond squitsch. En la culissa al telefon audian ins persunas che bragian, e las unfrendas vegnian admonidas da betg interrumper il telefonat.
La polizia chantunala recumonda dad esser precaut
- La polizia na pretenda mai daner blut al telefon.
- Terminai da quels telefonats ed infurmai immediat la polizia.
- Telefonai als parents e dumandai suenter.
- Dai mai daners a glieud nunenconuschenta.
- Discurri era cun enconuschents sur da quest tema.
