Ils engianaders sa dattan ora sco servetschs da sustegn per computers. La finamira dals criminals saja da survegnir access a datas sensiblas per far per exempel pajaments a bancas u per empustar insatge online.
Blers cas en la Svizra franzosa
Be en la Svizra franzosa ha la polizia annunzià 280 cas da fraud dapi l’entschatta da l’onn. Bunamain 900’000 francs sajan vegnids engulads uschia. Per sa proteger, cusseglia la polizia dad interrumper subit telefons nungiavischads da servetschs da sustegn per computers.
Tge èn ils trics dals engianaders?
Sco la polizia di, saja l'emprim contact cun lur victimas direct per telefon u sur in «Pop-up» che cumpara automaticamain sin il visur e mussa in numer da telefon ch'ins duai contactar.
En omadus cas di l'engianader u la engianadra ch'i dettia in problem sin il computer e di ch'el u ella saja in collavuratur d'in computer-helpdesk enconuschent. Suenter che la victima fida a l'engianader, survegn lez access sin il computer e dumonda suenter pleds-clav. Uschia chatta el era sez anc plirs pleds-clav cun ir tras il computer. Cun tut quels pleds-clav, codes ed auters elements d'identificaziun po il delinquent lura acceder a contos da banca e transferir daners.
Mai dar vinavant datas persunalas
Per sa proteger, cusseglia la polizia, da terminar immediat uschè in telefonat. Era duaja ins mai dar vinavant datas persunalas sco pleds-clav u numers da cartas da credit. La polizia avertescha era da dar access sin il computer ad insatgi auter.
