Igl èn stadas grondas novas l’onn passà a Flem: L’hotel Waldhaus è vendì. E quai a la Paval Holding ed Apex Alliance. Tuttas duas investuras èn da l'Europa da l’ost. Als frars Dragos ed Adrian Paval appartegna era Dedeman, il pli grond martgà da construcziun en la Rumenia. Ed ussa l'hotel da renum a Flem.
Il «nov» hotel Waldhaus dovra dapli plaz
Per che l’hotel possia prosperar, stoppia el avair dapli plaz, communitgescha la vischnanca da Flem. Gia dapi l'entschatta hajan ils novs proprietaris gì interess da cumprar la parcella 4397. Quai è la parcella en il nord da l’hotel Waldhaus. Sin quella parcella sa chatta era la Waldhaus Arena cun la halla da curling. Per sa sviluppar dovra l’hotel dapli spazi per letgs supplementars. Cunquai ch’in contract en dretg da construcziun na vegnia betg en dumonda, vul la vischnanca vender la parcella per 4 milliuns francs.
I sa tracta d’investurs internaziunals, nua che l’instrument dal contract da dretg da construcziun, sco quai che nus al enconuschain, n’è betg uschè enconuschent.
Enstagl d’in dretg da construcziun hajan las partidas concludì in dretg da recumpra per la parcella. Quel giess en vigur, sche la nova cumpradra na duvrass betg la parcella per l’intent d’alloschament. Tenor il president communal da Flem, Christoph Schmidt, veglia l’investider Dragos Paval investir a lunga vista. Perquai hai duvrà in tschert temp per la planisaziun. Tenor ils novs proprietaris duai l’Hotel Waldhaus avrir sias portas la proxima stagiun d’enviern.
E nua dar curling senza l'Arena?
E tge capita cun la Waldhaus Arena ch’è il mument la halla da curling da Flem? Enfin che la nova halla da curling a Prau la Selva saja construida (planisà 2027) possian ins vinavant dar curling a Flem Casa d’Uaul. La Arena vegniss suenter spazzada sin donn e cust dals novs proprietaris - quai tar in Gea a l’urna ils 13 d’avrigl. Tar in Na, restass la parcella cun la Waldhaus Arena en ils mauns dal public e vegniss alura messa ord funcziun.
Votaziun dals 13 d'avrigl 2025
Plinavant ha il suveran da Flem da decider ils 13 d'avrigl 2025 davart la revisiun parziala da la nova zona d'albiert, in credit da 1,97 milliuns francs per construir ina nova biblioteca, sco era in credit da 750’000 francs per ina nova senda per velos da muntogna tranter Foppa e la staziun sut a Flem:
Revisiun parziala da la planisaziun locala: manaschis d’alloschament
La vischnanca da Flem prevesa ina revisiun parziala per garantir e sviluppar ulteriuramain ils manaschis d'alloschament, surtut ils hotels istorics a Flem Casa d’Uaul. Ils 13 d'avrigl 2025 vegn ad avair lieu la votaziun davart la revisiun parziala da la planisaziun locala e l'adattaziun da la lescha da construcziun. Ina differenziaziun tranter las zonas d'alloschament A e B vegn fatga per proteger la substanza istorica ed empruvar novs svilups, uschia la vischnanca da Flem. Las mesiras hajan l'intent da rinforzar l'impurtanza turistica da la vischnanca da Flem e da garantir ils manaschis d'alloschament a lunga vista.
Nova biblioteca communala ed archiv communal
La vischnanca da Flem prevesa da construir ina nova biblioteca e da schlargiar l'archiv communal cun in credit da construcziun da 1'970'000 francs. La biblioteca existenta e l'archiv communal sajan tenor la vischnanca antiquads. Las novas installaziuns duain ademplir ils basegns moderns e rinforzar l'attracziun dal lieu. La nova construcziun vegn concepida sco pavigliun cun in'architectura pli averta.
Il project è vegnì sviluppà da Spreiter Architekten. Sch’il suveran di Gea, po la construcziun cumenzar l'atun 2025 ed esser terminada fin l'atun 2026. Il project haja l'intenziun da rinforzar la biblioteca sco lieu d'inscunter cultural e da garantir l'archivaziun segira e confurma a las normas da l'archiv communal per proteger documents istorics impurtants, uschia la vischnanca vinavant.
Nova senda per velos da muntogna «Foppatrail»
La vischnanca da Flem planisescha la construcziun da la senda per velos da muntogna tranter Foppa e la staziun sut da Flem. Il credit da construcziun per il «Foppatrail» munta a CHF 750'000.- e vegn finanzià principalmain tras il fond d'infrastructura da la Flem SA. La senda è planisada sco simpel «trail» per principiants. Las lavurs duain cumenzar la stad 2025 e vegnir terminadas l'atun 2025. L’Arena Alva surpiglia la gestiun ed il mantegniment dal trail. La votaziun per l'approvaziun dal credit ha lieu suenter che las adattaziuns da planisaziun èn vegnidas approvadas.